Այսօր՝ Տուբերկուլյոզի դեմ պայքարի համաշխարհային օրվա շրջանակներում Երևանի Հյուսիսային պողոտայում անցկացված իրազեկման ակցիայի ժամանակ, Հայաստանի ամերիկյան համալսարանի հանրային առողջապահության ֆակուլտետի դեկան Վարդուհի Պետրոսյանը ներկայացրել է այն ծրագիրը, որն իրականացվում է Հայաստանում՝ տուբերկուլյոզ հիվանդության դեմ պայքարի համար:

«Հայաստանում կա թվային ֆլյուրոգրաֆիա տրամադրող շարժական կլինիկա: Դրա նպատակն է շրջել ամբողջ Հայաստանով մեկ, հատկապես՝ Գեղարքունիքի, Տավուշի, Լոռու, Արագածոտնի մարզերի այն համայնքներում, որտեղ կա ֆլյուրոգրաֆիկ ծառայության պակաս: Այսինքն՝ շարժական կլինիկան այցելելու է  այդ համայնքներ, տրամադրելու է առողջապահական խորհրդատվություն, ինչպես նաև տեղեկատվություն ենք տարածելու տուբերկուլյոզ հիվանդության վերաբերյալ, դրա ախտանիշների վերաբերյալ, որպեսզի ընդհանուր իրազեկվածությունը բարձրացնենք մեր բնակչության», – ասել է Պետրոսյանը՝ հավելելով, որ շարժական կլինիկայի աշխատանքի դեպքում չի բացառվում, որ Հայաստանում տուբերկուլյոզով հիվանդացության նոր դեպքեր հայտնաբերվեն:

Հավելենք, որ հիվանդությունը Հայաստանում բուժվում է անվճար: 2018 թվականին տուբերկուլյոզի 650 նոր դեպք է գրանցվել: Տուբերկուլոզն աշխարհում այսօր բուժվող հիվանդություն է համարվում:

Հիշեցնենք, որ 1882 թվականի մարտի 24-ին գերմանացի մանրէաբան Ռոբերտ Կոխը հայտարարել էր տուբերկուլյոզի հարուցչի հայտնաբերման մասին։ Դրանից 111 տարի անց` 1993 թվականից ի վեր Առողջապահության համաշխարհային կազմակերպության որոշմամբ մարտի 24-ն ամբողջ աշխարհում նշվում է որպես Տուբերկուլյոզի դեմ պայքարի համաշխարհային օր: Սա ևս մեկ առիթ է խոսելու հիվանդության ազդեցության մասին, ինչպես առանձին անհատի առողջությանը, այնպես էլ հասարակությանը և տնտեսությանը հասցրած դրա վնասների մասին