Դեղակայուն տուբերկուլոզային բաժանմունքը Թոքաբանության ազգային կենտրոնի գլխավոր բաժանմունքներից է, այստեղ կազմակերպվում և իրականացվում են տուբերկուլոզի դեղակայուն ձևերով պացիենտների մասնագիտացված համալիր ստացիոնար և վերականգնողական միջոցառումներ՝ Առողջապահության համաշխարհային կազմակերպության արդի խորհրդատվություններին համահունչ:

Տուբերկուլոզի դեղակայուն ձևերը դրա ամենավտանգավոր տեսակներից են: Հակատուբերկուլոզային դեղերի անկանոն օգտագործման հետևանքով տուբերկուլոզային միկոբակտերիաները ձեռք են բերում կայունություն (կամ ի սկզբանե լինում են այդպիսին)՝ դրանով իսկ չենթարկվելով տուբերկուլոզի բուժման ստանդարտ սխեմաներին: Դա է պատճառը, որ տուբերկուլոզի դեղակայուն ձևերը այսօր իրենցից մեծ վտանգ են ներկայացնում: Դրան զուգահեռ աճում է տուբերկուլոզի դեղակայուն ձևերով հիվանդների թիվը՝ խոչընդոտելով հիվանդության ամբողջովին վերացմանն ուղղված ազգային ծրագրերի իրականացմանը: Սակայն սա չի նշանակում, որ դեղակայուն տուբերկուլոզը հնարավոր չէ բուժել: Պարզապես դրա բուժումը երկարատև է՝ անհրաժեշտ դեղորայքի ընդունման ռեժիմի խիստ պահպանմամբ:

Դեղակայուն տուբերկուլոզի ախտորոշումը կատարվում է համալիր լաբորատոր և գործիքային հետազոտություններով: Արագ թեստերով մի քանի ժամվա ընթացքում հնարավոր է որոշել տուբերկուլոզային միկոբակտերիաների զգայունությունը հակատուբերկուլոզային դեղամիջոցների նկատմամբ և ըստ այդմ համարժեք բուժում կազմակերպել: Հեսիտալացման ցուցում ունեցող պացիենտները սկզբում բուժվում են ստացիոնար բաժանմունքում ՝ բժշկի խիստ հսկողությամբ, ապա դուրս են գրվում ամբուլատոր ցանց, որտեղ շարունակում են իրենց բուժումը տեղամասային տուբերկուլոզային կաբինետներում՝ տեղամասային ֆթիզիատրի հսկողությամբ:

Դեղակայուն տուբերկուլոզային բաժանմունքը 50 մահճակալային ֆոնդով տարեկան սպասարկում է մոտ 300 պացիենտ, և տուբերկուլոզի ախտորոշումն ու բուժումը այստեղ իրականացվում է անվճար՝ պետության կողմից երաշխավորված անվճար բժշկական օգնության և սպասարկման շրջանակներում:

2009-2022 թվականներին բաժանմունքը ղեկավարել է բժշկական գիտությունների թեկնածու/բժիշկ-ֆթիզիատր Լուսինե Միքայելի Եղիազարյանը, ով հանդիսանում է նաև ՀՀ առողջապահության նախարարության տուբերկուլոզի և թոքաբանության գծով խորհրդատուն: Լուսինե Եղիազարյանը մասնագիտացել է ֆթիզիատրիայի բնագավառում՝ մասնակցելով միջազգային դասընթացների և համաժողովների Երևան, Թբիլիսի, Ռիգա, Բանգկոկ, Բիշքեկ, Ժնև, Զալցբուրգ քաղաքներում:

2022 թվականից բաժանմունքը ղեկավարում է բժիշկ-ֆթիզիատր, թոքաբան Լիլիթ Գևորգի Գևորգյանը: Ավարտելով Երևանի պետական բժշկական համալսարանը՝ նա կատարելագործել է իր մասնագիտական հմտություններն ու ունակությունները՝ մասնակցելով բազմաթիվ միջազգային դասընթացների և համաժողովների: Նա հանդիսանում է տուբերկուլոզի վարման կլինիկական ուղեցույցի և տուբերկուլոզի վերացմանն ուղղված ազգային ռազմավարության աշխատանքային խմբի անդամ, ֆթիզիատրիայի հայերեն դասագրքի և անգլերեն ձեռնարկի համահեղինակ: Որպես բաժանմունքի ղեկավար, նա շարունակում է ուսումնասիրել ու իր ներդրումն ունենալ տուբերկուլոզի ախտորոշման և բուժման նորագույն մեթոդների մշակման մեջ: